Kunstnaren Bjørn Strandenes og gourmetkokken Bjørn Hettervik inviterer til ei oppleving der kunst, mat og natur vert vovne saman til ei sanserik reise. Dette samarbeidet spring ut frå ei felles inspirasjon i møtet med landskapet og menneska i det – frå Borgøy i vest til Utne i Hardanger.

Historia byrja i 2009, då Strandenes for første gong vitja Borgøy, invitert av ein kunstinteressert ven frå Haugesund. Der vart han introdusert for Bjørn Hettervik, som den gongen leia dei lokale gourmetdagane. Møtet med Hettervik, øya og menneska som budde og arbeidde der, vart ei sterk og formande oppleving for kunstnaren. Det var her det kreative samspelet mellom dei to tok til.

Hettervik, som sjølv er frå Borgøy – fødestaden til målaren Lars Hertervig – delte ikkje berre røtene, men òg ei lidenskap for å formidla det vakre i det nære. Året etter utvikla samarbeidet seg vidare med kunstutstilling, gourmetmat og musserande drikke. Eit personleg venskap voks fram og la grunnlaget for det nye prosjektet på Utne Hotel.

Måleria til Strandenes er inspirerte av møtet med naturen og menneska som lever tett på henne. Sidan Utne er ein del av denne reisa, ber bileta preg av både staden og stemninga der. Professor Gunnar Danbolt har tidlegare skildra Strandenes sitt arbeid som «mellom figurasjon og abstraksjon» (Paris 2003), men i møtet med Hardanger og Utne har uttrykket vorte meir figurativt – og fargepaletten tydeleg endra.

Opphaldet på Utne, med sitt levande hotellmiljø og nære kontakt med lokale siderprodusentar og handverkarar, har påverka både motivval og fargar. Resultatet er ei utstilling med sprakande energi, rotfesta i det ekte og det estetiske.

No vert verka stilte ut i galleriromma på det ærverdige Utne Hotel, til glede for både tilreisande og lokalbefolkning i Hardanger.